
那洛巴大师教言集NARO26གཏུམ་མོ་འདོད་ཆགས་རྡོ་རྗེའི་ཤོག་རིལ།
1-4-31b

༄༅། །གཏུམ་མོ་འདོད་ཆགས་རྡོ་རྗེའི་ཤོག་རིལ།
༄༅། །གཏུམ་མོ་འདོད་ཆགས་རྡོ་རྗེའི་ཤོག་རིལ་
བཞུགས་སོ། །ཨུ་བརྒྱན་(རྒྱན་)གྱི་གདམས་པ། མཁའ་འགྲོ་མ་ཐམས་ཅད་ཀྱི་ཡང་སྙིང་། རྒྱུད་ཐམས་ཅད་ཀྱི་སྙིང་པོ་བསྡུས་པའི་མན་ངག །རིན་ཆེན་གསེར་ཞུན་དྲིལ་བ་ལྟ་བུ་ཡིན་ཏེ། དཔལ་
ན་རོ་པ་ཆེན་པོའི་བཞེད་ཀྱིས། ལུས་ཀྱི་གནས་ཐབས་སྒོམ་པའི་གནད། །སེམས་ཀྱི་གནས་ཐབས་ལྟ་བུའི་གདེང་། །ཕྱི་ནི་སྒྱུ་མ་ལྷའི་སྐུ། །ནང་གི་རྩ་གསུམ་འཁོར་ལོ་བཞི། །ཞེས་པའི་དོན།
སྒྱུ་མ་ལྟ་བུའི་ལྷ་སྐུ་དང་། སེམས་ཀྱི་གནས་ཐབས་ལྟ་བའི་གདེང་ནི་བསྐྱེད་རྫོགས་ཚིག་བསྡུས་[བསྐྱེད་རྫོགས་ཚིག་བསྡུས་ནི། སློབ་དཔོན་ལ་བ་པའི་བཞེད་པ། ཚིག་སྡེ་བཞི་གསུམ་བཅུ་གཉིས་སུ་བསྡུས་
པ་ནི། གཞི་ལམ་འབྲས་གསུམ་ངོ་སྤྲད་པ་དང་། བྲལ་བ་རང་བཞིན་དྲི་མ་མེད་པ། མཚན་ཉིད་སྣང་སྟོང་དབྱེར་མེད་པ། ཐབས་དང་ཤེས་རབ་གཉིས་སུ་མེད་པའོ། །དེ་རྣམས་ནི་བཞིའི་ཆོས་ཡིན་ལ། ལམ་གྱི་ཆོས་བཞི་ནི། ཟག་
1-4-32a

པ་མེད་པའི་བདེ་བ་ཆེན་པོ། གསལ་བ་རང་བྱུང་བ། མ་སྐྱེས་པ་ལྷུན་གྱིས་གྲུབ་པའི་མི་རྟོག་པ་བདེ་གསལ་མི་རྟོག་པར་དབྱེར་མེད་ཟུང་དུ་ཆུད་པའོ། །འབྲས་བུའི་ཆོས་བཞི་ནི། སྐུ་གསུམ་དབྱེར་མེད་པ་བདེ་བ་ཆེན་
པོ། འོད་གསལ་ཟུང་དུ་འཇུག་པའི་ཡེ་ཤེས། སོ་སོ་རང་རིག་གཡོ་བ་མེད་པའི་བྲིས། མི་གནས་པའི་མྱ་ངན་ལས་འདས་རྣམ་པར་དག་པའི་མཛད་པའོ། །དེ་ལ་ཕྱག་རྒྱ་ཆེན་པོའི་དོན་བསྡུས་བཞིའོ། །འདི་དག་བདུད་རྩི་ཆུ་རྒྱུན་ལས་གསུངས་སོ། །]
ཀྱི་སྐབས་སུ་བསྟོན་ལ། ལུས་ཀྱི་གནས་ཐབས་བསྒོམ་པའི་གནད་ལ། རྩ་གསུམ་འཁོར་ལོ་བཞི་ཞེས་པས། དེ་ཡང་དཔལ་ན་རོ་པའི་བཞེད་ཀྱིས། རྩ་རྡོ་རྗེ་ཐོད་སྦྱོར་གྱི་མན་
ངག །འོག་རླུང་རྡོ་རྗེ་ཐོད་སྦྱོར་གྱི་མན་ངག །ཐིག་ལེ་རྡོ་རྗེ་ཐོད་སྦྱོར་གྱི་མན་ངག་གསུམ་འདིས་བསྡུས་ནས་བསྟོན་པས། ཆགས་གྲོལ་གཉིས་ཀྱི་མན་ངག་ཅེས་བྱའོ། །དེ་ཡང་
རྒྱལ་པོ་མཆོག་གསུམ་དེ་རབ་མཆོག །མཎ་ཏྲ་ཨ་པ་ང་ལ་དྲིས། །དཀྱིལ་འཁོར་རྒྱལ་མཆོག་ལྷ་རྒྱལ་མཆོག །སྔགས་ཀྱི་རྒྱལ་མཆོག་གསུམ་པ་ཡིན། །དེ་ཡང་འཁོར་ལོ་བཞི་ན་སྡེ་པ་
བཞི་གནས། སྡེ་པ་བཞི་ལ་ལྷའི་ཕོ་བྲང་བཞི། ལྷའི་ཕོ་བྲང་བཞི་ན་ལྷ་བཞི་གནས་ཏེ། ལྷ་བཞི་རེ་རེ་ལ་འཁོར་ལོ་བཞི་བཞི་གནས་སོ། །རྒྱུད་སམ་བྷུ་ཏ་ལས་ཀྱང་། གང་ཕྱིར་བསྟན་
1-4-32b

པས་སྤྲུལ་པའི་ཕྱིར། །སྤྲུལ་པའི་འཁོར་ལོ་གནས་བརྟན་པ། །ཆོས་རྣམས་ངག་ཏུ་འབྱིན་པས་ན། །ཐམས་ཅད་ཡོད་སྨྲ་ཆོས་འཁོར་ལོ། །གང་ཕྱིར་མགྲིན་པར་ཉམས་མྱོང་པས། །ལོངས་སྤྱོད་
འཁོར་ལོ་མང་པོས་བསྐུར། །གང་ཕྱིར་བདེ་ཆེན་ཕྱིར་གནས་པ། །བདེ་ཆེན་འཁོར་ལོ་ཕལ་ཆེན་པོའོ། །འཁོར་ལོ་བཞི་ནི་སྡེ་བཞི་སྟེ། །དེ་དབུས་ལྟེ་བ་གཙུག་ལག་ཁང་། །ལྟེ་དབུས་སྤྲུལ་པའི་འཁོར་ལོ་ན། །
དབང་ཆེན་ས་ཡིས་དཀྱིལ་འཁོར་ཏེ། །ཨ་ལས་རིན་ཆེན་མགོན་པོ་བཞུགས། །ཨེའི་རང་བཞིན་ལྷ་མོ་སྤྱན། །མཁའ་འགྲོ་མ་བཞི་ཕྱོགས་ན་གནས། །ལས་ཚོགས་ཕྲིན་ལས་བསྒྲུབ་(སྒྲུབ་)པ་པོ། །རྣམ་པར་སྣང་
མཛད་རིགས་ཀྱི་ལྷ། །ཀུན་གྱི་ཨུ་བརྒྱན་(རྒྱན་)ཚུལ་དུ་ཡོད། །ནམ་མཁའི་ལྷ་མོ་པང་ན་གནས། །དེ་ནི་འབྱུང་བ་ལྔ་ལ་དབང་། །སྙིང་ཁ་ཆོས་ཀྱི་འཁོར་ལོ་ནི། །ཆུའི་དཀྱིལ་འཁོར་ཉིད་ཡིན་ཏེ། །ཧཱུཾ་ལས་རྡོ་རྗེ་མགོན་
པོ་བཞུགས། །བམ་གྱི་རང་བཞིན་མཱ་མ་ཀི། །རིགས་ཀྱི་དབུ་བརྒྱན་(རྒྱན་)གོང་དང་མཚུངས། །ཡུམ་ནི་འབྱུང་བ་གཅིག་ལ་དབང་། །མགྲིན་པ་མང་པོས་བསྐུར་གནས་ནི། །མེ་ཡི་དཀྱིལ་འཁོར་ཉིད་ཡིན་
ཏེ། །པདྨ་མགོན་པོ་ཡི་གེ་ཧྲཱི། །མ་ཡི་རང་བཞིན་གོས་དཀར་མོ། །ཀུན་གྱི་དབུ་བརྒྱན་(རྒྱན་)རྣམ་སྣང་མཛད། །ནམ་མཁའི་ལྷ་མོ་པང་ན་གནས། །བདེ་བ་ཆེན་པོའི་འཁོར་ལོ་ནི། །རླུང་གི་དཀྱིལ་འཁོར་ཞེས་
1-4-33a

བྱ་བ། །གཾ་ཁམ་ལས་ཆས་ཀྱི་མགོན་པོ་བཞུད། །ཡ་ནི་རང་བཞིན་སྒྲོན་མར་གྲགས། །ཀུན་གྱི་ཕྱོགས་ན་ལྷ་བཞི་སྟེ། །དེ་ནི་འབྱུང་བ་བཞི་ལ་དབང་། །རིགས་ཀྱི་བདག་པོ་གོང་
བཞིན་བསྒོམ། །དེ་ནི་ལྷ་དང་དཀྱིལ་འཁོར་གྱི། །ངེས་པ་ཁོ་ནར་བསྟན་པའོ། །སྔགས་ཀྱི་ངེས་པ་འདི་ལྟ་སྟེ། །གཡས་པ་ཐབས་ཀྱི་རྩ་སྒོ་ནས། །ཁ་དོག་ལྔ་ཡི་རང་བཞིན་ཏེ། །ཡེ་ཤེས་ལྔའི་ངོ་བོར་བྱས། །
ཡི་གེ་ཧཱུཾ་དུ་གྱུར་ནས་སུ། །རླུང་དང་ཡི་གེ་ཐ་དད་མེད། །ཧཱུཾ་དཔག་ཏུ་མེད་པ་ཕར་ལ་འཕྲོས། །འོད་ཟེར་ལྔའི་ནུས་པ་ལས། །ནང་བཅུད་སེམས་ཅན་མ་ལུས་པ། །རྒྱལ་བ་རིགས་ལྔའི་ངོ་བོར་གྱུར། །
གཡོན་པ་ཤེས་རབ་རྩ་གནས་སུ། །འབྱུང་ལྔ་རླུང་གི་རང་བཞིན་ཏེ། །ཚུར་འདུས་ཡི་གེའི་རང་བཞིན་ཨོཾ། །རླུང་དང་ཐིག་ལེ་ཐ་དད་མེད། །འོད་ཟེར་ལྔའི་ངོ་བོར་བྱོན། །བརྟན་གཡོ་[བསྙེན་སྒྲུབ་ཚིག་
རྐང་ལས། འབྱུང་འཇུག་གནས་གསུམ་རྩ་བའི་རླུང་རྣམས་ཀྱང་། །དེ་དུས་སྐུ་གསུང་ཐུགས་ཀྱི་བཟླས་པར་གྱུར་ཞེས།] ནང་དུ་བསྡུས་པ་ལས། །ཐམས་ཅད་འདུ་བ་ཆོས་ཉིད་ཡིན། །སྤྱན་མ་ལ་སོགས་ཡུམ་ལྔར་གནས། །
དབུས་ན་གནས་པ་ཆོས་ཉིད་རྩ། །ཨ་བ་དྷུ་ཏིའི་མར་སྣ་རུ། །སེམས་དམིགས་ཡི་གེ་ཨ་ལ་གཏད། །རླུང་དང་ཡི་གེ་ཐ་དད་མེད། །འབྱུང་བཞི་རླུང་གི་རང་བཞིན་དེ། །ནམ་མཁའི་རླུང་དུ་རོ་གཅིག་
1-4-33b

ན། །འཇིག་རྟེན་ཁམས་ཀུན་མཆོད་པའི་གནས། །རྡོ་རྗེ་འཛིན་པ་རང་ཉིད་འགྱུར། །སྐུ་གསུམ་ཡེ་ཤེས་ལྔ་ཡི་བདག །ཁྱབ་བདག་ནམ་མཁའི་གཟུགས་སུ་འགྱུར། །དེ་ནི་སྔགས་ཀྱི་ངེས་པ་སྟེ། །
ངག་ལམ་རྡོ་རྗེའི་བཟླས་པའོ། །དེ་ཡང་རྩ་གསུམ་འདུས་དབུས་མེ་ཐབ་ཏུ། །རླུང་གིས་བསྐུལ་བའི་ཡེ་ཤེས་མེ། །ཤེས་རབ་སྟོབས་ཀྱིས་རབ་འབར་ཏེ། །ལྟེ་བར་གཏུམ་མོ་སྤར་ནས་ནི། །དེ་ཡི་
མཐར་ཡང་རིམ་བཞིན་བསྲེགས། །བརྒྱད་ཀྱི་མཐར་ནི་བཅུ་པ་སྟེ། །ཡི་གེ་བཅུ་ཡི་འདུག་ཚུལ་དང་། །ཉོན་མོངས་ལྔ་ཡིས་གནས་ཚུལ་གཉིས། །གཅིག་ཏུ་བསྡེབས་ནས་བསྲེགས་པ་ལས། །
སྤྱི་གཙུག་ཧཾ་གི་རི་བོང་ལས། །ཞུན་མར་ཐིག་(ཐིགས་)པ་ཇི་བཞིན་དུ། །བདུད་རྩིའི་ཆུ་རྒྱུན་བབས་པ་ལས། །བཞུགས་སར་རྒྱལ་བ་རིགས་ལྔ་དང་། །དེ་ཡི་རང་བཞིན་ཡེ་ཤེས་ལྔར། །རྒྱུ་ལ་འབྲས་བུས་རྒྱས་བཏབ་པས། །འབྲས་བུ་བུ་ལ་རྒྱུས་
རྒྱས་བཏབ། །འདི་ནི་བདེ་བ་ཆེན་པོ་སྟེ། །རྡོ་རྗེ་འཆང་གི་རང་བཞིན་ནོ། །ཨ་བ་དྷུ་ཏིའི་མར་སྣ་རུ། །སྐུ་མདོག་དཀར་པོ་ཡོངས་སུ་གྲུབ། །བདག་མེད་མ་ཡིས་མགུལ་ནས་མཁྱུད། །ཐབས་དང་
ཤེས་རབ་མཉམ་སྦྱོར་བས། །ཟུང་འཇུག་འབྲས་བུ་འདོད་པ་ཡིན། །[གནས་སྐབས་ཀྱི་འབྲས་བུ་ཕྲིན་ལས་བཞི་དང་། གྲུབ་ཆེན་བརྒྱད་དེ། ཕྲིན་ལས་བཞི་ནི། བརྟག་གཉིས་ལས། དབང་དང་། མངོན་སྤྱོད་དང་། དགྲའི་སྡེ་
1-4-34a

འཇིག་པ་དང་། བསྐྲད་པ་དང་། བསད་པ་དང་། དགུག་པ་དང་། ཞི་བ་དང་རྒྱས་པར་ཡང་འགྱུར་རོ། །གྲུབ་ཆེན་བརྒྱད་ནི། གུར་ལས། མིག་སྨན་དང་ནི་རྐང་མགྱོགས་དང་། །རལ་གྲི་ས་འོག་བསྒྲུབ་པ་དང་། །དྲིལ་བུ་མཁའ་
ལ་སྤྱོད་དང་། །མི་སྣང་བ་དང་བཅུད་ཀྱིས་ལེན། །ཞེས་གསུངས་སོ། །]མཐར་ཐུག་གི་འབྲས་བུ་ནི་སྐུ་བཞི་ནི། འབོ་ལ་ཀ་ཀོ་ལར་བཅུག་ནས། །བསྲུབ་དང་སྲུབ་པའི་སྦྱོར་བ་ལས། །དགའ་བ་བཞི་པོ་རིམས་ཇི་བཞིན། །
བདེ་བ་ཉམས་སུ་མྱོང་པ་ཡང་། །རྡོ་རྗེ་རེག་སོགས་བསྐུལ་ནས་ཡང་(ཀྱང་)། །ཕྱི་ནང་གསང་བའི་མཆོད་པ་ཡིས། །ཟླ་རེ་བཅུ་ཕྲག་གཉིས་པ་དང་། །བཅོ་ལྔ་ནི་དེ་རབ་ཏུ་མཆོད། །དུས་མཆོད་ཆེན་
པོར་འདོད་པ་ཡིན། །དགྱེས་པ་རྡོ་རྗེའི་ལུང་ལས་ཀྱང་། །ལྟེ་བར་གཏུམ་མོ་སྤར་བས་ནི། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡང་བསྲེགས་ཏེ། །ཧཾ་བསྲེགས་རི་བོང་
ཅན་བསྲེགས་འཛག །ཅེ་(ཅེས་)པ་དང་། ཨེ་ཡི་རྣམ་པ་ལྷ་མོ་ཅན། །བཾ་གྱི་རྣམ་པ་བདག་མེད་བརྗོད། །མ་ཡི་རང་བཞིན་གོས་དཀར་མོ། །ཡ་ནི་སྒྲོན་མར་བརྗོད་པར་བྱ། །ཞེས་སོ། །འཁོར་ལོ་བཞི་ཡི་
པད་འདབ་ལ། །ཨ་ལི་ཀ་ལི་མཉམ་འདྲེས་པའི། །སྡེ་ཚན་ལྔ་བཅུ་ཐམ་པ་ནི། །གསུང་རབ་ཡན་ལག་བཅུ་གཉིས་དང་། །རྒྱུད་སྡེ་བཞི་དང་སྡེ་གནོད་གསུམ། །བཅུ་གཉིས་བར་ནས་ཡི་གེ་ནི། །རི་
1-4-34b

རཱི་ལི་ལཱི་བཞི་སྟོན་པས། །[ཡན་ལག་བཅུ་གཉིས་ནི། ཤན་ཏི་པའི་ཞལ་ནས། མདོ་སྡེ་དབྱངས་སྙན་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་དཔྱོད་དེ་ལྟ་བུ་བྱུང་དང་། །སྐྱེས་རབས་ཤིན་དུ་(ཏུ་)རྒྱས་པའི་སྡེ། །
རྨད་བྱུང་གཏན་ལ་དབབ་པའོ། །ཅེས་(ཞེས་)གསུངས་སོ། །འདི་ཡི་གེ་ལ་སྦྱར་ན། དབྱངས་ཡིག་བཅུ་དྲུག་གི་ནང་ནས་རྀ་རཱྀ་ལི་ལཱི་བཞི་མ་གཏོགས་གཞན་ཨ་ཨཱ་ནས་ཨཾ་ཨའི་བར་ཡིན་ནོ། །]གསང་སྔགས་རྒྱུད་དུ་འདོད་པ་ཡིན། །སྡེ་
ཚན་ལྔ་ནི་མདོ་ཡི་སྡེ། །མཐར་གནས་ལྔ་ནི་མངོན་པ་ལ། །དེ་བས་ཡིག་འབྲུ་འདུལ་བ་དངོས། །བརྗོད་པ་ཀུན་གྱི་ཐོག་མར་ནི། །ཨ་ནི་ཁོང་ནས་འབྱུང་བ་ཡིན། །ཨ་ནི་ཡིག་འབྲུ་ཀུན་གྱི་མཆོག །ཁོང་
ནས་འབྱུང་བ་སྐྱེ་བ་མེད། །ཚིག་ཀུན་རབ་ཏུ་གསལ་བར་བྱེད། །རྣམ་ཐར་སྒོ་གསུམ་མཚོན་པ་ཡི། །དུས་གསུམ་རྒྱལ་བའི་ཡུམ་དེ་ལ། །རབ་ཏུ་གུས་པས་ཕྱག་བགྱིད་དེ། །སྡེ་པ་རེ་ལ་གནས་བརྟན་
བཞི། །ཐམས་ཅད་བསྡུས་ན་བཅུ་དྲུག་ཡོད། །ཆོས་དཔོན་ནམ་མཁའི་ཐིག་ལེས་བྱེད། །ཆོས་རྣམས་སྐྱེ་མེད་ཚུལ་དུ་བཤད། །འབྱུང་བཞིའི་རླུང་ནི་གཟའ་མི་ཡིན། །གང་ལ་གཉེར་བབ་དེ་ལས་
བྱེད། །གནས་གཏན་བཞི་ལ་གཟའ་མི་ནི། །སྟོང་ཚོ་གཅིག་དང་བརྒྱད་ཅུ་ཡོད། །དེ་བཞིན་གནས་བརྟན་བཅུ་དྲུག་ལ། །གཟའ་མི་སྟོང་ཚོ་བཞི་དང་ནི། །སུམ་བརྒྱ་ཉི་ཤུ་ཡོད་པར་འདོད། །སྡེ་པ་གཅིག་
1-4-35a

གི་གཟའ་མི་དང་། །ཆོས་དཔོན་གཅིག་གི་འཁོར་གྲངས་མཉམ། །གནས་བརྟན་པའི་སྡེ་པ་ལ། །ཕྱི་རྒྱ་རང་འདོམ་ཉི་ཤུ་ཡོད། །ཡོད་པར་སྨྲ་བའི་སྡེ་པ་ལ། །ཕྱི་འདོམ་བཅུ་
དྲུག་ཡོད་པ་ཡིན། །མང་པོས་བཀུར་བའི་སྡེ་པ་ལ། །རང་འདོམ་བཅུ་གཉིས་བར་དུ་རྟག །ཕྱིར་གནས་ཕལ་ཆེན་སྡེ་པ་ལ། །ཕྱི་རྒྱ་བཅུ་དང་དྲུག་ཡོད་དེ། །གཉིས་པོ་དྲུག་ལ་མནན་པས་ནི། །བརྒྱད་
པ་གཉིས་སུ་འདོད་པ་ཡིན། །བརྒྱད་པ་གཅིག་ལ་ཆོས་དཔོན་གྱི། །བྲང་ཁང་ཆེ་ཆུང་ཚད་དང་ལྡན། །རྩ་རྣམས་ཁྱིམ་གྱི་ཚུལ་དུ་ཡོད། །ཕྱི་སྒོ་གཉིས་པོ་སྟེང་ནས་བསྡོམ། །ནང་སྒོ་གཉིས་པོ་འོག་
ནས་བསྡོམ། །མཆོད་ཁང་སྒོ་ནི་དབུས་ན་དེ། །ཕྱེད་པ་མེད་དེ་ཤིན་དུ་(ཏུ་)དཀའ། །སྡེ་པ་བཞིའི་ཆོས་དཔོན་ཚོ། །དུས་སྦྱོར་འཐུན་སྤྱོད་རྩི་བ་ནི། །ཆུ་ཚོད་སུམ་ཅུ་རྩ་གཉིས་སོ། །རྒྱུན་ཆད་མེད་པར་རྩི་ཡིན་
ཡོད། །རྩ་ཡི་ཆུ་ཚོད་སུམ་ཅུ་གཉིས། །སྤྱི་བོའི་གཙུག་ནས་རྩི་ཡིན་ཡོད། །རླུང་གི་ཆུ་ཚོད་སུམ་ཅུ་གཉིས། །སྡེ་པ་བཞི་ལ་ཉིན་མཚན་གཉིས། །གཉིས་ཀྱི་གཉེར་རེས་འཁོར་ན་གསལ། །ཐིག་
ལེའི་ཆུ་ཚོད་སུམ་ཅུ་གཉིས། །སྡེ་པ་བཞི་ལ་དྲིས་ན་གསལ། །རྩ་ཡི་ཐུན་བྱེད་བརྒྱད་པོ་ནི། །ཡོད་པར་སྨྲ་བའི་སྡེ་པ་རྩི། །རླུང་གི་ཐུན་ཆེན་བརྒྱད་པོ་ཡང་། །འཕོ་བ་གཉིས་ལ་ཐུན་ཚོད་གཅིག །
1-4-35b

ཉིན་མཚན་གཉིས་ལ་བརྒྱད་དུ་འདོད། །ཐིག་ལེའི་ཐུན་ཆེན་བརྒྱད་པོ་ནི། །འཁོར་ལོ་བཞི་ན་བརྒྱད་བརྒྱད་གནས། །རྩ་ཡི་འཕོ་བ་བཅུ་དྲུག་ནི། །མགྲིན་པའི་གནས་ནས་རྩི་ཡིན་མོད། །རླུང་གི་འཕོ་
བ་བཅུ་དྲུག་ནི། །ཐུན་ཚོད་རེ་ལ་འཕོ་དུས་གཉིས། །ཉིན་མཚན་གཉིས་ལ་བཅུ་དྲུག་ཡོད། །ཐིག་ལེའི་བོ་བ་བཅུ་དྲུག་ནི། །བཅུ་དྲུག་ཕྱེད་ཕྱེད་ཐིག་ལེ་ཅན། །རྩ་ཡི་དབྱུག་གུ་དྲུག་ཅུ་བཞི། །གནས་
བརྟན་པའི་ཁྱིམ་ན་རྡེག །རླུང་གི་དབྱུག་གུ་དྲུག་ཅུ་བཞི། །བཞི་མཐུན་རེ་ལ་ཕྱེད་དུ་བསྒོས། །ལྔ་བརྒྱ་བཞི་བཅུ་ཡོང་བ་ཡིན། །ཐིག་ལེའི་དབྱུག་གུ་དྲུག་ཅུ་བཞི། །སུམ་ཅུ་རྩ་གཉིས་འབབ་པ་དང་། །
བཞི་ལ་སུམ་ཅུ་རྩ་གཉིས་གནས། །དྲུག་ཅུ་རྩ་བཞི་དེ་རུ་རྫོགས། །དུས་ཀྱི་རླུང་ལ་ཁུ་བྱུག་བཞིན། །དེ་ཚོས་ཐམས་ཅད་གསལ་བར་གནས། །འབྱུང་བཞི་ཕྱིའི་ཞིང་ས་ལ། །སྐྱེ་མཆེད་བཅུ་གཉིས་
ལྷག་མ་གཉིས། །སྟོན་ཐོག་ཚུལ་དུ་རྩི་བ་ཡིན། །སྡེ་པ་ཆེན་པོའི་སྣོད་དུ་བསྡུད། །ཟས་སྐོམ་གཉིས་པོ་ནང་གི་རྫས། །རྩ་གསུམ་འདུས་མོད་རྒྱ་ཐབ་ཏེ(སྟེ)། །མཉམ་གནས་རླུང་གི་ཕྱག་ཚང་པས། །སྡེ་པ་
བཞིའི་གཟའ་མི་གསོ། །བཟའ་མི་གནས་སུ་མ་ཚུད་ན། །འཐབ་དང་རྩོད་པ་མང་པོ་འབྱུང་། །གནས་བརྟན་ཕྱི་རུ་འཐོན་པ་ན། །ནང་གི་སྡེ་པ་ཉམས་ནས་འགྲོ། །གནས་བརྟན་བཞི་ན་མཆོད་དཔོན་རེ། །
1-4-36a

སྡེ་པ་བཞི་ལ་ཤིན་དུ་(ཏུ་)གཅེས། །བཞི་སྟོང་སུམ་བརྒྱ་ཉི་ཤུ་པོ། །ཆོས་དཔོན་བཞི་ལ་འདུས་ནས་སུ། །སྡོང་པོ་བརྒྱད་ཅུ་དང་མཉམ་ན། །རླུང་ནི་རྡོ་རྗེ་ཐོད་པ་ལ། །སྦྱོར་
བའི་མན་ངག་འདི་ནས་བསྟོན། །གཏུམ་མོའི་མན་ངག་བསྒོམ་པ་གཅེས། །སྡེ་པ་བཞི་ན་གནས་བརྟན་བརྒྱད། །ཐམས་ཅད་བགྲོས་ནང་གནས་བརྟན་ལ། །འབབ་པའི་ཕྲིན་ལས་བྱེད་དུས་དེར། །
ཉེ་ཞོ་མེད་པར་བྱོན་ནས་སུ། །སྔར་གྱི་གདན་ལ་བཞུགས་ནུས་ན། །ཐིག་ལེ་རྡོ་རྗེ་ཐོད་པ་ལ། །སྦྱོར་བའི་མན་ངག་འདི་ནས་སྟོན། །ཆགས་ལམ་བསྒོམ་པ་ཤིན་ཏུ་གཅེས། །རྩ་འདབ་སུམ་ཅུ་རྩ་
གཉིས་སོ། །ཀུན་འདར་མ་དང་ཁྱད་མེད་པར། །ཕྱི་ནང་ཤིན་དུ་(ཏུ་)གསལ་བ་དང་། །འགྱུ་བ་ཤིན་དུ་(ཏུ་)བདེ་བ་ནི། །བཟུང་འཛིན་གཉིས་ལས་གྲོལ་བ་སྟེ། །རྩ་རྣམས་རྡོ་རྗེ་ཐོད་པ་ལ། །འདུ་ཏིའི་ནང་དུ་སྦྱོར་
བ་འོ། །ཟུང་འཇུག་བསྒོམ་པ་ཤིན་དུ་(ཏུ་)གཅེས། །རང་ལུས་ཐབས་དང་ལྡན་པ་ལ། །བདག་གི་རྣམ་དག་དེ་ཡིས་ཤེས། །འཁོར་ལོ་བཞིའི་ལྟེ་དབུས་ན། །ལྷའི་རྣམ་དག་ཡང་དག་ལྡན། །རླུང་གི་འབྱུང་
1-4-36b

འཇུག་ཕྲ་མོ་ནི། །སྔགས་ཀྱི་བཟླས་པ་ཡིན་ཤེས་པས། །གཡས་གཡོན་གཉིས་ཀྱི་བཟུང་འཛིན་རླུང་། །འདུ་ཏིར་གནས་པ་ཡེ་ཤེས་ཡིན། །དགའ་བ་བཞི་དང་སྐད་ཅིག་བཞི། །བཞི་ཚན་གཉིས་པོ་
གཏུམ་མོ་དང་། །ཆགས་གྲོལ་གཉིས་ལ་སྦྱོར་ཤེས་བྱ། །དེ་ལྟར་བསྒོམས་པའི་རྟགས་རྣམས་ནི། །གཏུམ་མོ་བཀའ་དཔེའི་ནང་ན་གསལ། །བརྒྱུད་པ་འདི་ཀ་འཛིན་པ་ཡི། །འཕྲུལ་འཁོར་བླ་མའི་ཞལ་
ནས་ནི། །རྩ་གནས་བཞིའི་མདུད་པ་དེ། །རྐེད་པ་གཡས་བསྐོར་(སྐོར་)གཡོན་བསྐོར་(སྐོར་)གྱིས། །ལྟེ་བའི་རྩ་མདུད་འགྲོལ་བ་ཡིན། །དཔུང་རིངས་གཡས་འགྱིངས་གཡོན་འགྱིངས་གིས(ཀྱིས)། །སྙིང་གའི་རྩ་མདུད་
འགྲོལ་བ་ཡིན། །གཡས་བསྐོར་(སྐོར་)གཡོན་བསྐོར་(སྐོར་)དགྱེ་སྒུ་ཡིས། །མགྲིན་པའི་རྩ་མདུད་འགྲོལ་བ་ཡིན། །རྐང་ལག་བརྐྱང་བསྐུམ་བྱས་པ་ཡིས། །ཚིགས་ཀྱི་རྩ་མདུད་འགྲོལ་བ་ཡིན། །གནས་པ་རྩ་
ཡི་མན་ངག་དང་། །གཡོན་བ་རླུང་གི་མན་ངག་དང་། །བཀོད་པ་བྱང་ཆུབ་སེམས་ལ་སོགས། །མ་ན་འདི་ལས་གཞན་གྱིས་མིན། །དེ་ཕྱིར་ཤིན་དུ་(ཏུ་)རྙེད་དཀའོ། །བྲང་གི་སྙིང་དང་དཔྲལ་བའི་མིག །
མཆན་གྱི་བུ་ལས་གཅེས་མེད་ཕྱིར། །མན་ངག་འདིའི་གཏད་ས་ནི། །འདོད་ཆགས་རྡོ་རྗེ་ཉིད་ལའོ། །ཨྠིྀ།། །།


目录
གཏུམ་མོ་འདོད་ཆགས་རྡོ་རྗེའི་ཤོག་རིལ།